Un incendio rexistrado na noite do xoves destruíu unha vivenda deshabitada no municipio de Lugo, que provocou o corte dunha rúa para que os bombeiros desenvolvesen o seu traballo. Así o informou a Policía Local de Lugo, que explicou que axentes deste corpo, cuarto patrullas das de servizo, desprazáronse ás 22,15 horas do xoves á rúa Sierra Gañidoira, onde no número 7 había un lume nunha vivenda deshabitada.

No lugar os bombeiros realizaron labores de extinción, mentres que os axentes da Policía Local estableceron un perímetro de seguridade e procederon ao corte da vía afectada para que os bombeiros desenvolvesen "con liberdade", segundo concretaron as mesmas fontes, a súa actividade.

A casa afectada polo lume, composta de baixo e unha planta, resultou destruída polas lapas. A vivenda estaba deshabitada, polo que a Policía Local indicou que "tan só houbo danos materiais". Debido a este lume interviñeron dúas unidades dos bombeiros ata as 1,45 horas deste venres día 21, cando finalizaron os traballos.

"PUIDO SER INTENCIONADO"

A beira da vivenda sinistrada hai outra tamén deshabitada que non sufriu dano, mentres que polo outro lateral sitúase un solar, segundo explicaron as mesmas fontes, que apuntan que o incendio "puido ser intencionado", con posibilidade de acceso pola parte posterior que dan a unhas hortas. A Policía Local de Lugo subliñou que se acordoou con valos toda a zona afectada "para garantir a seguridade".